பாடல் -4

இன்னிசை வீணையர், யாழினர், ஒருபால்;
இருக்கொடு தோத்திரம் இயம்பினர் ஒருபால்;
துன்னிய பிணைமலர்க் கையினர், ஒருபால்;
தொழுகையர் அழுகையர், துவள்கையர் ஒருபால்;
சென்னியில் அஞ்சலி கூப்பினர் ஒருபால்;
திருப்பெருந் துறையுறை சிவபெரு மானே!
என்னையும் ஆண்டுகொண் டின்னருள் புரியும்
எம்பெரு மான்! பள்ளி எழுந்தரு ளாயே!

பொருள்:

சிலர் வீணை, யாழ் போன்ற இசைக்கருவிகளுடன் இன்னிசை எழுப்புகின்றனர். சிலர் ரிக்வேதம் போன்ற தோத்திரங்களால் துதிக்கின்றனர், தொடுத்த மாலைகளுடன் சிலர் காத்து நிற்கின்றனர், அன்பு மேலீட்டால் சிலர் தொழுதவண்ணமும் சிலர் அழுதவண்ணமும் நிற்கின்றனர்; மகிழ்ச்சி மேலீட்டால் சிலரது தொழுத கைகள் தன் வசமிழந்து துவண்டு விட்டன. திருப்பெருந்துறைத் தலைவனே! இவர்களுக்கு அருளவும் என்னை ஆட்கொள்ளவும் பள்ளி எழுந்தருள்வாய்!